Fréttir

Upphátt, upplestrarkeppni grunnskólanna á Akureyri var haldin í Hofi í gær. Fulltrúi okkar, Konný Björk Þórðardóttir varð í 2. sæti keppninnar og óskum við henni innilega til hamingju með frammistöðuna.

Í dag var haldin undankeppni upplestrarkeppninnar Upphátt í 7. bekk. Nemendur lásu texta og ljóð á sal skólans og stóðu sig vel. Dómnefnd var skipuð af Hólmfríði Sigurðardóttur, Maríu Steingrímsdóttur og Þorgerði Sigurðardóttur. Valdir voru fulltrúarnir Eyþór Páll Ólafsson, Konný Björk Þórðardóttir og Máni Kristjánsson til keppa fyrir hönd skólans í aðalkeppninni sem fram fer í Hofi þann 7. mars nk.

Á morgun, fimmtudaginn 29. febrúar er nemendum í 9. og 10. bekk boðið að að koma á Starfamessu og kynna sér fjölbreytt störf og fyrirtæki á svæðinu. Starfamessan verður haldin í Háskólanum á Akureyri og stendur frá klukkan 09:00-12:00 og er árlegur viðburður skipulagður af náms- og starfsráðgjöfum í grunnskólum Akureyrarbæjar í samvinnu við Háskólann á Akureyri. Á Starfamessunni verða fjölmörg fyrirtæki og stofnanir saman á einum stað til þess að kynna sig og sína starfssemi fyrir nemendum sem eru hvattir til að nýta sér þetta tækifæri til þess að skoða hin ýmsu fyrirtæki og stofnanir og þeim framtíðarmöguleikum sem í boði eru.

10. bekkur Naustaskóla stendur fyrir POP-up viðburði í skólanum til fjáröflunar á morgun miðvikudag, 28. febrúar kl. 17:00-21:00. Þar verða í boði fjölbreyttir réttir frá ólíkum menningarheimum og alls kyns fræðsla. Sjá facebook viðburð:

Í morgun héldum við Litlujól í Naustaskóla. Morguninn byrjaði með fallegum helgileik í boði 4. bekkjar og því næst fóru allir inn í íþróttasalinn sem búið var að skreyta hátt og lágt. Þar var dansað í kringum jólatréð við undirleik Sigríðar Huldu og þrír skemmtilegir jólsveinar kíktu í heimsókn. Krakkarnir fóru síðan í sínar stofur og áttu notalega stund með starfsfólki og jólasveinarnir kíktu meira að segja þangað líka! Unglingadeildin hélt sín litlujól í gærkvöld með sínum kennurum og starfsfólki unglingadeildar. Eftir að börnin fóru heim í dag borðaði starfsfólk saman jóla hádegisverð og Svavar Knútur kom í heimsók með söng og skemmtilegheit. Hér eru nokkrar myndir. Starfsfólk Naustaskóla sendir nemendum, foreldrum og forráðamamönnum þeirra gleðilegra jóla. Frístund opnar þann 3. janúar á nýju ári og skóli hefst þann 4. janúar.

Í dag fengum við viðurkenningu sem réttindaskóli UNICEF á Íslandi. Við vinnum markvisst að því að börn, kennarnar, foreldrar og aðrir sem tengjast skólanum þekki réttindi barna og beri virðingu fyrir þeim. Réttindaráð skólans tók við viðurkenningunni og fána réttindaskólans. Foreldrafélagið bauð upp á skúffuköku í tilefni dagsins.

Viðburðarríkri en stuttri nemendaviku er senn lokið. Á miðvikudaginn var nemendadagur sem hefð er fyrir í Naustaskóla. Um morguninn voru settar upp ýmsar skemmtilegar stöðvar í skólanum, m.a. kom Guðrún Huld danskennari til okkar og var með danssmiðju. íþróttakeppni var haldin milli nemenda í 10. bekk og starfsfólks skólans í fótbolta, körfubolta og blaki. Nemendur báru sigur úr bítum í fótbolta en starfsfólk vann bæði körfuboltakeppni og blak. Að þessu sinni tóku nemendur þátt í hæfileikakeppni og er skemmst frá því að segja að þátttaka þar var mjög góð. Greinilegt er að nemendur eru metnaðarfullir og lögðu sig vel fram. Dómnefnd keppninnar var skipuð af nemendum og starfsfólki skólans. Þetta er vandasamt verkefni en velja þurfti þrjú atriði í efstu sæti: Í þriðja sæti urðu stúlkur úr þriðja bekk sem voru með leikþátt en það voru þær Tinna G, Tinna Karítas, Jóhanna, Katrín, Rakel og Ýr. Í öðru sæti var drengur úr fimmta bekk, Gísli Ólafsson með söngatriði og svo í fyrsta sæti drengur í 10. Bekk, Eiður Reykjalín sem spilaði einleik á píanó. Gaman er að sjá hvað nemendur eru að fást við utan skólans og hvað þau eru hæfileikarík á mörgum sviðum sem endurspeglar m.a. aðkomu foreldra í að mennta börnin sín og styðja við þeirra áhugasvið. Dagurinn endaði svo með góðri pylsuveislu. Hér má sjá myndir frá deginum.