Fréttir

Í síðustu viku var Evrópsk samgönguvika og í tilefni af henni ákváðum við að gera könnun meðal nemenda og athuga hvernig þeir ferðast í skólann.  Jafnframt var að sjálfsögðu hvatt til að sem flestir kæmu gangandi eða hjólandi.  Niðurstöður könnunarinnar liggja nú fyrir og eru eins og sjá má á myndinni hér fyrir neðan.  Það er ljóst að æskilegt væri að mun fleiri kæmu gangandi í skólann en segja má að nemendur í 4.-5. bekk séu sigurvegarar átaksins en þar kemur stærsta hlutfall nemendahópsins í skólann með eigin afli. 

Aðalfundur Foreldrafélags Naustaskóla verður haldinn í sal skólans kl. 20:00 fimmtudagskvöldið 19. september. Á dagskrá eru hefðbundin aðalfundarstörf, kynning á Mentor og auk þess kemur ungur maður að nafni Kristján Guðmundsson með fyrirlesturinn "Gefst aldrei upp". Kristján lenti í alvarlegu vinnuslysi og segir okkur frá því hvernig hann tókst á við þá lífsreynslu. Hann kemur aftur í skólann með sama fyrirlestur fyrir nemendur á næstu dögum. Ætlast er til að a.m.k. einn fulltrúi frá hverju heimili mæti á fundinn! Kaffi og kleinur í boði :) Stjórn Foreldrafélagsins

Vikuna 16.-20. september ætlum við að hafa sérstaka skráningu á því hvernig nemendur koma í skólann, þ.e. hvort þeir koma gangandi, hjólandi, með strætó eða með bíl.  Tilgangur þessa er að hvetja til hreyfingar og jafnframt að auka öryggi umferðar við skólann.  Svo er að sjá hvaða hópur innan skólans er heilsusamlegastur að þessu leyti.....

Nú hafa nemendur kosið fulltrúa sína í nemendaráð vetrarins.  Það er þannig skipað: Brynjar Helgason 10. bekk – formaður, Eva María Sævarsdóttir 10. bekk – varaformaður, Sylvía Sól Guðmundsdóttir 9. bekk, Freyr Jónsson 8. bekk, Róbert Valur Reynisson 7. bekk, Sunneva Kristjánsdóttir 6. bekk, Aron Vikar Pétursson 5. bekk og Aron Ísak Hjálmarsson 4. bekk. Varamenn í nemendaráði eru: Júlíus Fannar Thorarenson 10. bekk, Helena Hrund Vignisdóttir 9. bekk, Birgir Freyr Magnason 8. bekk, Brynjólfur Skúlason 7. bekk, Haraldur Bolli Heimisson 6. bekk, Aþena Arnarsdóttir 5. bekk og Ríkey Guðjónsdóttir 4. bekk.

Vikuna 9.-13. september verða haldnir morgunfundir með foreldrum í Naustaskóla.  Þar er um að ræða kynningu fyrir foreldra á starfinu í skólanum auk þess sem tækifæri gefast til umræðna og fyrirspurna.  Fundirnir verða kl. 8:10-9:10 að morgni, nemendur mæta einnig á sama tíma og venjulega þessa daga nema að nemendur í 8.-10. bekk fá að sofa örlítið lengur þann 12. sept. og mæta þá kl. 9:15.  Fundirnir verða sem hér segir: 2.-3. bekkur föstudaginn 13. september kl. 8:10-9:10 4.-5. bekkur miðvikudaginn 11. september kl. 8:10-9:10 6.-7. bekkur mánudaginn 9. september kl. 8:10-9:10 8.-10. bekkur fimmtudaginn 12. september kl. 8:10-9:10 Áður en morgunfundirnir hefjast, kl. 7:45-8:10 þessa daga, munu nemendur í 10. bekk selja rúnstykki, kaffi og kókómjólk.  Það er því um að gera fyrir nemendur og foreldra að taka daginn snemma og mæta saman í skólann, fá sér rúnstykki eða jafnvel hafragraut áður en haldið er til fundar og náms.  Rúnstykki kostar 200 kr. og rúnstykki + kókómjólk 300 kr.  Ekki er hægt að greiða með kortum. Rétt er að minna foreldra á að bílastæði við skólann eru mjög af skornum skammti þannig að það er nauðsynlegt að allir sem það mögulega geta komi gangandi...!!

Nú leikur veðrið við okkur og við stefnum því ótrauð að útivistardegi á morgun, föstudaginn 6. september. Nemendur hafa valið sér ýmis viðfangsefni og með því að smella á hnappinn hér á eftir má nálgast nánari upplýsingar um daginn..

Leitin að Grenndargralinu 2013 hefst föstudaginn 13. september. Að venju er Leitin í boði fyrir nemendur á unglingastigi í grunnskólum Akureyrar. Í ár er Leitin valgrein og er það í fyrsta skipti frá því að fyrsta Leitin fór fram haustið 2008. Þrátt fyrir nýtt fyrirkomulag er Leitin að Grenndargralinu í boði fyrir alla nemendur í 8.-10. bekk í grunnskólum Akureyrar, óháð því hvort þeir völdu hana sem valgrein eða ekki. Allt sem þarf að gera er að hefja leik þegar fyrsta þraut fer í loftið, fara eftir fyrirmælum, leysa þrautina og skila lausnum til umsjónarmanns með tölvupósti. Fyrir réttar lausnir sendir umsjónarmaður bókstaf til baka sem notaður verður til að mynda lykilorðið. Þetta er endurtekið næstu níu vikurnar eða svo eða þar til kemur að lokavísbendingunni. Þá er Grenndargralið innan seilingar. Einfaldara getur það ekki orðið.  Nánari upplýsingar um Leitina 2013 má nálgast á heimasíðu Grenndargralsins; www.grenndargral.is

Nú er septemberfréttabréfið komið út og inniheldur það ýmsar hagnýtar upplýsingar og að sjálfsögðu matseðil og helstu atriði í dagskrá septembermánaðar.  Við minnum á að afar gott er að prenta út baksíðu ritsins og hengja á ísskápshurðina...   Smellið hér til að opna fréttabréfið

Skólafærninámskeið fyrir foreldra nýnema í Naustaskóla verður haldið þriðjudaginn 3. september kl. 17:30-20:00.  Námskeið af þessu tagi eru haldin árlega fyrir foreldra nýnema en markmiðið með þeim er að fræða foreldra um skólann okkar og grunnskólakerfið almennt.  Dagskrá þess verður sem hér segir: Að byrja í grunnskóla - hvað þýðir það fyrir börnin okkar? Grunnskólakerfið á Íslandi - yfirlit og upplýsingar Naustaskóli / starfshættir / agastefna / kennsluaðferðir o.fl. Samskipti heimila og skóla / upplýsingamiðlun - mentorkerfið o.fl. Foreldrafélag / skólaráð / stoðþjónusta Ætlast er til að fulltrúar allra nemenda í 1. bekk mæti á námskeiðið en aðrir eru að sjálfsögðu einnig velkomnir. Boðið verður upp á barnagæslu meðan á námskeiði stendur og léttan málsverð fyrir þátttakendur og börn.