Fréttir

Kæra skólasamfélag Síðustu vikur hafa verið mjög sérstakar i skólasamfélaginu þar sem starfsfólk, nemendur og foreldrar hafa tekist á við einstaka tíma. Allir hafa staðið sig mjög vel en eru nú líklega farnir að bíða eftir því að dagleg rútína hefjist aftur. Nú líður að afléttingu takmarkana á skólastarfi. Frá og með mánudeginum 4.maí nk. munu grunnskólar hefja starf aftur með hefðbundnum hætti og almenn skólaskylda tekur gildi. Nemendur í Naustaskóla munu mæta eldhressir í skólann 5. maí eftir starfsdag 4.maí. Áfram verða þó í gildi sóttvarnarráðstafanir sem snúa að hreinlæti og sótthreinsun. Fjöldatakmarkanir í nemendahópum verða ekki lengur í gildi og nemendur geta óhindrað notað sameiginleg svæði, s.s. útisvæði og mötuneyti. Fjöldatakmarkanir gilda þó um fullorðna sem starfa í skólanum og því þurfa þeir að gæta að 2 metra fjarlæg og huga að hámarksfjölda í rými sem miðast við 50 einstaklinga. Mælst er til þess að skólar og foreldrafélög skipuleggi ekki fjölmennar samkomur út þetta skólaár vegna þess að gestakomur og heimsóknir foreldra eru ekki leyfðar í maí. Við í Naustaskóla munum fara eftir þessum tilmælum. Við hlökkum öll til að takast aftur á við hefðbundið skólastarf án takmarkana núna strax eftir næstu helgi. Kær kveðja stjórnendur Naustaskóla

Kæru foreldrar. Nú hefur Naustaskóli hafið skólastarfið að nýju eftir kærkomið páskafrí. Við höldum okkur við sama skipulag og var fyrir páska, kennum 1. -5. bekk í 20 barna hópum og 6. -7. bekk í 10 -12 barna hópum. Allt skipulag varðandi innganga, matsal og Frístund er enn í gildi og verður fram til 4. maí. Þá ætti eðlilegt skólastarf að geta hafist að nýju. Dagana 22.apríl og 24. apríl eru skráðir starfsdagar á skóladagatalinu, en þá daga ætlaði starfsfólk Naustaskóla í námsferð til Brighton. Vegna núverandi ástands í heiminum hefur þeirri ferð verið frestað fram á haustið. Í ljósi aðstæðna hefur verið ákveðið að færa þessa starfsdaga fram til 4. maí og 22. maí. Með því móti náum við að nýta þá betur til samstarfs og undirbúnings skólaloka. Frístund mun verða lokuð 4. maí en opin 22. maí. Að lokum biðjum við ykkur að láta umsjónarkennara vita með dags fyrirvara ætli börnin ykkar að snúa aftur í skólann. Þannig getum brugðist við og skipulagt hópana upp á nýtt og sem best tryggt að farið sé eftir fyrirmælum almannavarna og sóttvarnalæknis varðandi hópastærðir. Mikilvægt er að senda póst á umsjónarkennara sé ætlunin að framlengja dvöl barnanna heima nú eftir páska þannig að við fáum sem besta yfirsýn á nemendahópinn okkar varðandi skipulag skóladagsins og heimanáms..Við ítrekum að öll börn eru velkomin í skólann en það er ykkar foreldra og forráðamanna að ákveða hvort börnin dvelji heima. Með góðum kveðjum og þakklæti fyrir gott samstarf á krefjandi tímum. Skólastjórnendur Naustaskóla.

Starfsfólk Naustaskóla óskar nemendum og fjölskyldum þeirra gleðilegra páska og vonum við að páskaleyfið verði ánægjulegt. Kennsla hefst að loknu páskafríi þriðjudaginn 14. apríl og mun skólastarfið verða með svipuðu sniði og síðustu daga.

Af gefnu tilefni biðjum við ykkur að koma ekki inn í skólann. Þetta gerum við til að verja nemendur og starfsfólk fyrir mögulegum smitberum. Best er að hringja í ritara skólans s: 4604100 eða senda tölvupóst á dis@akmennt.is eða kristjana@akmennt.is eða kennara viðkomandi barns ef nauðsyn krefur. Þökkum fyrir gott samstarf og veittan skilning á þessum erfiðu tímum.

Stjórnendur leik-, grunn- og tónlistarskóla Akureyrarbæjar hafa síðan á föstudag unnið að útfærslu á skólastarfi í samræmi við tilmæli sóttvarnarlæknis og stjórnvalda. Í dag hefur allt starfsfólk komið að málum og hver skóli útfært starf í viðkomandi skóla næstu daga og vikur. Í ljósi þess að skólastarf verður með mismunandi hætti milli skóla eru foreldrar beðnir um fylgjast vel með upplýsingum sem birtast munu á heimasíðum skólanna auk þess sem allir foreldrar munu fá nánari upplýsingar í tölvupósti í dag, mánudag. Grunnskólar Kennsla verður í hópum með hámark 20 nemendum og ekki verður um blöndun hópa að ræða innan skóladagsins. Skólar munu halda úti eins miklu skólastarfi og kennslu og kostur er við þessar aðstæður. Útfærslan verður í höndum hvers skóla að skiptingu kennslu milli viðveru í skóla og náms heima. Nákvæm útfærsla verður því ólík milli skóla, allt eftir mannafla og aðstæðum á hverjum stað. Öll hefðbundin kennsla í list- og verkgreinastofum mun falla niður og íþrótta- og sundkennsla verður í formi hreyfingar á skólalóð, inni í hópastofum eða annarrar útikennslu. Hver skóli skipuleggur nánari tilhögun skóladagsins og kennslutilhögun. Sérdeildir og sérskólar verða með óbreytta starfsemi eftir fremsta megni. Framreiðsla á mat verður í boði ef mögulegt er að koma því við. Vettvangsferðir falla niður ásamt ferðum í skólabúðir. Hugað verður sérstaklega að þörfum barna með hverskonar sérþarfir auk þess að tryggja þeim foreldrum sem starfa á heilbrigðisstofnunum þjónustu fyrir þeirra börn. Leikskólar Gert er ráð fyrir því að halda starfsemi leikskóla gangandi á sem öruggastan hátt með þeim hætti að börn verði í sem minnstum hópum og aðskilin sem mest. Vegna þessa raskast skólastarf í leikskólum, opnunartími getur breyst s.s. vegna þrifa sem nauðsynleg eru og í einhverjum tilvikum. Hver leikskóli mun upplýsa foreldra um útfærslu á skólastarfi á heimasíðu eða í gegnum aðra miðla. Frístundaheimili og félagsmiðstöðvar Frístundaheimili verða opin í framhaldi af skóladegi yngstu nemenda en viðbúið er að starfsemi muni að einhverju leyti skerðast. Tónlistarskólar og skólahljómsveitir Tímar í hljóðfærakennslu og söngkennslu fara fram í húsnæði Tónlistarskóla Akureyrar. Hóptímar s.s. hljómsveitartímar, hópæfingar, tónfundir, forskóli og tónfræðitímar falla niður. Allir viðburðir tengdir þessari starfsemi falla niður. Viðmið þessi taka einnig til tónlistarnemenda sem eru eldri en 18 ára. Lögð er áhersla á að leitað sé leiða til að viðhalda virkni óháð fjarveru og niðurfellingu tónlistartíma. Nákvæmari útfærsla mun koma frá TA. Skólaíþróttir og íþróttafélög Ekki verður hefðbundin íþrótta- og sundkennsla á vegum grunnskóla í samkomubanninu. Viðkomandi húsnæði verður lokað fyrir skólakennslu og íþrótta- og sundkennarar vinna með námshópnum í heimastofu eða úti á skólalóð. Íþróttafélög munu gefa út eigin tilkynningar um íþróttaæfingar. Tilkynningar eru þegar komnar frá íþróttasamböndum um leikjabann. Skólastarf í Naustaskóla næstu vikurnar Hér í Naustaskóla hefur verið unnið ötullega að hópaskiptingum og öðru skipulagi næstu vikna. Kennarar munu senda til foreldra bréf með upplýsingum um þann hóp sem þeirra barn tilheyrir næstu vikurnar. Þar kemur einnig fram hvar í húsinu barninu verður kennt og hverjir sjá um kennsluna og inn um hvaða inngang hver námshópur kemur. Búið er að skipta námshópunum á innganga hússins til að koma í veg fyrir samskipti þeirra á milli. Biðjum við foreldra að kynna sér vel bréf frá kennurum en þar ættu að finnast svör við flestum spurningum. Við munum fella niður útivistardag á morgun og árshátíð skólans hefur verið frestað um óákveðin tíma. Hér fyrir neðan má sjá tímasetningar á viðveru nemenda eftir árgöngum. Mikilvægt er að þessar tímasetningar séu virtar til þess að lágmarka megi samgang nemenda.  1.- 4. bekkur verður í skólanum frá kl. 8:10 – 13:00. Þau fá að borða í skólanum og þau börn sem eru skráð í Frístund fara þangað þegar skóla líkur. Foreldrar barna í frístund eru beðin um að senda þau með nesti fyrir síðdegishressingu en boðið verður upp á drykki í skólanum.  5. – 7. bekkur. Verður í skólanum frá kl. 8:20 – 12:30. þau fá að borða í skólanum og fara síðan heim.  8. – 10. bekkur mætir kl. 13:00 – 15:30. Hjá þeim árgöngum verður einnig lögð áhersla á fjarnám. Þau geta komið 12:45 og borðað áður en kennsla hefst. Ekki er hægt að bjóða upp á ávexti í nestistímum og þurfa nemendur því að koma með hollt nesti að heiman. Við munum ekki bjóða upp á hafragraut næstu vikur. Frístund verður starfandi fyrir nemendur sem þar eru skráðir. Starfsmenn Frístundar munu skipta börnunum upp í litla hópa sem dreifast á svæði Frístundar og yngri deilda á neðri hæð.Þessar upplýsingar eru vissulega ekki tæmandi og margar spurningar munu eflaust vakna. Við biðjum ykkur að kynna ykkur þessar upplýsingar vel og einnig upplýsingar frá kennurum. Við bendum á að mikilvægt er að fylgjast með tölvupósti og á heimasíðu skólans þar sem allar helstu upplýsingar verða settar inn eftir þörfum. Mögulega verða einhverjar breytingar á skipulagi næstu daga. Við minnum okkur öll á að við gegnum mikilvægu hlutverki í almannavörnum og erum meðvituð í samskiptum og sóttvörnum. Við höfum takmarkað aðgengi að skólanum og biðjum við foreldra að kveðja börn sín fyrir utan skólann ef mögulegt er. Mikilvægt er að tilkynna til skólans veikindi eða ef barn eða fjölskylda fer í sóttkví. Ákveði foreldrar að halda börnum sínum heima eða að nýta ekki Frístund biðjum við um að senda þær upplýsingar til ritara skólans. Við stjórnendur og starfsfólk Naustaskóla erum þakklát fyrir þann stuðning og velvilja sem við höfum fundið fyrir í þessum erfiðu aðstæðum. Á þessum erfiðu tímum er mikilvægt að við tökum höndum saman til þess að tryggja að börnunum líði vel og að þau finni fyrir öryggi. Stjórnendur Naustaskóla.

Í ljósi aðstæðna og einnig óhagstæðrar veðurspár frestum við útivistardeginum sem átti að vera á morgun, þriðjudag um óákveðinn tíma.

Starfsdagur í grunn- og leikskólum Akureyrarbæjar mánudaginn 16. mars Eins og komið hefur fram í fjölmiðlum í dag hefur heilbrigðisráðherra ákveðið að virkja heimildir sóttvarnalaga sem fela m.a. í sér að skólahald verður takmarkað tímabundið. Nánari útfærslur verða unnar samkvæmt tilmælum stjórnvalda. Í ljósi þessa hefur verið ákveðið að mánudaginn 16. mars verði starfsdagur í leik- og grunnskólum Akureyrarbæjar svo stjórnendur og starfsfólk geti skipulagt skólastarfið sem best á þessu tímabili sem takmörkunin nær til. Foreldrar leik- og grunnskólabarna eru beðnir að fylgjast vel með upplýsingum sem birtast munu um helgina og á mánudaginn m.a. á heimasíðu Akureyrarbæjar og heimasíðum grunn- og leikskóla.