Fréttir

Naustaskóli náði góðum árangri í Skólahreysti sem fram fór í Íþróttahöllinni í gær, fimmtudaginn 16. mars þegar liðið deildi 3.-4. Sæti með Oddeyrarskóla. Giljaskóli lenti í öðru sæti en Síðuskóli bar sigur úr býtum. Keppendur frá Naustaskóla voru þau Birgir Baldvinsson, Bjarney Sara Bjarnadóttir, Helgi Björnsson og Védís Alma Ingólfsdóttir og varamenn voru þau Alexander L. Valdimarsson og Embla Sól Garðarsdóttir.

Vert er að vekja athygli á sýningunni Sköpun bernskunnar sem nú er opin í Listasafni Akureyrar (Ketilhúsinu), en þar eiga nemendur okkar í 2.-5. bekk verk í bland við verk starfandi listamanna og muni frá Leikfangasafninu. Nánari upplýsingar hér

Einn af föstu liðunum í skólastarfinu hjá okkur er hæfileikakeppni nemendaráðs sem haldin er á hverju ári. Að þessu sinni var hún haldin föstudaginn 19. febrúar og voru átta atriði sem kepptu til úrslita, en í verðlaun voru að vanda veglegir vinningar. Að lokum fór svo að það var Vilhjálmur Sigurðsson í 5. bekk sem fór með sigur af hólmi en hann spilaði á selló. Í 2. sæti urðu þær Jóna Birna og Sonja Li í 4. bekk en þær voru með dansatriði, og í 3. sæti voru Kolbrún Líf, Þórný Sara og Tinna Malín í 4. bekk en þær sungu og spiluðu á fiðlu. Aukaverðlaun hlaut svo Amanda Eir í 4. bekk fyrir einsöng. Á meðfylgjandi mynd má sjá sigurvegara keppninnar í ár..

Nemendur á unglingastigi fengu að spreyta sig á að rannsaka valin líffæri úr svínum, en það er alltaf mjög áhugaverð vinna.

Barnabókasetur stendur fyrir myndbandasamkeppni fyrir nemendur í 5.-10. bekk grunnskóla. Keppt er í tveimur flokkum, 5.-7. bekk og 8.-10. bekk. Markmiðið er að hvetja börn og unglinga til að lesa og tjá sig um bækurnar sem þau lesa. Með því að gera lestur barna og unglinga sýnilegri og virkja hina ungu lesendur til jafningjafræðslu getum við fjölgað lestrarhestunum - fengið fleiri til að brokka af stað - og gert lestur að spennandi tómstundaiðju. Ekki veitir af! Nemendur geta unnið einir eða í hópi. Fjalla skal um eina barna- eða unglingabók að eigin vali í hverju myndbandi. Bókin þarf að hafa komið út á íslensku á árunum 2014-2015. Myndböndin skulu vera 2-3 mínútur að lengd. Vista skal myndböndin á netinu (til dæmis youtube.com) og senda slóðina og upplýsingar um höfunda til barnabokasetur@unak.is Skilafrestur rennur út 20. mars. Sjá nánar á barnabokasetur.is Öll myndböndin verður því hægt að sjá á netinu. Valin myndbönd verða jafnframt tengd við einn fjölsóttasta vef landsins, gegnir.is þar sem þau munu koma að góðum notum þegar börn og unglingar leita sér að lesefni. Verðlaun: Fyrstu verðlaun: 25 þúsund krónur. Önnur verðlaun: 15.000 krónur. Þriðju verðlaun: 10.000 krónur. Auk þess fær skólasafnið í skóla sigurvegarans 100 þúsund króna bókaúttekt frá Félagi íslenskra bókaútgefenda.