Fréttir

Sigga Dögg kynfræðingur er búin að vera með fræðslu fyrir 8. bekkinga í grunnskólum Akureyrar. Í kvöld, þriðjudag 12. janúar, mun hún vera með sambærilega fræðslu fyrir foreldra barna frá 5.-10. bekk og verður fyrirlesturinn haldinn í Síðuskóla kl. 20. Sigga Dögg talar mjög opinskátt um náin samskipti einstaklinga, kynlíf og klám.

Miðvikudaginn 9. desember var hefðbundinni stundaskrá hent út í horn og nemendur unnu að hinum ýmsu viðfangsefnum á margvíslegum stöðvum.  Unnið var hálftíma á hverri stöð en nemendur máttu sjálfir velja sér stöðvar/viðfangsefni hverju sinni.  Foreldrafélagið bauð svo upp á kakó í nestistímanum, 10. bekkur seldi skúffukökur og allt saman gekk þetta eins og best var á kosið.  Hér má sjá nokkrar myndir frá deginum..

Að morgni dags þann 1. desember komu allir nemendur skólans saman á samverustund þar sem m.a. voru tilkynnt úrslit í lestrarátakinu okkar.  Átakið hófst á degi íslenskrar tungu þann 16. nóvember og í tvær vikur kepptust allir nemendur skólans við að lesa sem mest og skrá niður þær mínútur sem nýttar voru til lestrar.  Síðan voru reiknuð meðaltöl fyrir hvern námshóp og að lokum var niðurstaðan sú að það voru nemendur í 2.-3. bekk sem höfðu lesið lengst að meðaltali.  Fulltrúar þess hóps voru því kallaðir upp á svið þar sem þau veittu móttöku bikar í viðurkenningarskyni fyrir árangurinn og á meðfylgjandi mynd má sjá fulltrúa hópsins með bikarinn góða.  Til hamingju og nú er um að gera að halda áfram að lesa af krafti og bæta færnina til framtíðar!