1. bekk boðið á tónleika 17. janúar

Menningarfélag Akureyrar og Norðurorka bjóða 5 og 6 ára börnum á Akureyri (fæddum 2009 og 2010) á tónleika Sinfóníuhljómsveitar Norðurlands – Frost. Boðið er liður í samfélagsverkefni Norðurorku og Menningarfélags Akureyrar en markmið þess er að færa menninguna nær íbúum bæjarins og auka aðgengi hennar fyrir hvern sem er.  

Á tónleikunum verður Greta Salóme, fiðluleikari og söngkona, í aðalhlutverki. Hún kynnir okkur fyrir starfi nútíma tónlistarmannsins sem ekki aðeins spilar verk klassísku meistaranna heldur einnig þungarokksslagara, fer í Eurovison með eigin tónsmíðar og ferðast um heiminn og spilar tónlist fyrir Disney og önnur stórfyrirtæki. Á tónleikunum brúar Greta bilið á milli þessara ólíku strauma og stefna, með fiðluna að vopni og fræðir þannig ungdóminn um töfraheim tónlistarinnar.

Sem fyrr sagði er Greta studd af Sinfóníuhljómsveit Norðurlands en einnig verða á sviðinu hrynsveit og þrír kórar auk þess sem dansarar frá Steps Dance Center taka þátt í sýningunni. Gestasöngvari á tónleikunum er Magni Ásgeirsson.

Tónleikarnir fara fram þann 17. janúar og er 5 og 6 ára börnum bæjarins boðið að koma klukkan 13:00. Gert er ráð fyrir 45 mínútna tónleikum þar sem leikið verður við öll skilningarvit áhorfenda en mikið sjónarspil mun eiga sér stað á meðan á tónleikum stendur.

Hverju barni er boðið að taka með sér einn fylgdarmann á tónleikana en því miður er ekki hægt að bæta við miðum umfram það þar sem salurinn ræður ekki við meiri fjölda.

Til þess að þiggja boðið þarf einungis að mæta í Hof þann 17. janúar, tímanlega þar sem tónleikarnir byrja klukkan 13:00.

Allar frekari upplýsingar fást í miðasölu Hofs, sími: 450-1000.

Við hlökkum til að sjá ykkur.

Fyrir hönd Menningarfélags Akureyrar

Anna Bergljót Thorarensen