Aðalnámskrá grunnskóla - ný drög að almennum hluta

Mennta- og menningarmálaráðuneytið hefur nú birt endurskoðuð drög að almennum hluta aðalnámskrár grunnskóla á vefsvæði sínu  sjá hér.  Fyrstu drög að almennum hluta námskrárinnar voru sett á vef ráðuneytisins sl. sumar og óskað var eftir athugasemdum.  Fjölmargar gagnlegar ábendingar og athugasemdir bárust.  Einnig kynntu fulltrúar ráðuneytisins drögin á fundum með hagsmunaaðilum þar sem leitað var eftir sjónarmiðum þeirra. Starfshópur á vegum ráðuneytisins hefur farið yfir allar ábendingar sem bárust og skilað ráðuneytinu endurskoðuðum drögum.  Þessi drög eru nokkuð breytt frá þeim fyrri, hér er m.a. að finna drög að viðmiðunarstundaskrá og viðmiðunum fyrir námsmat við lok grunnskóla sem ekki voru í fyrri drögum.  Unnt er að senda inn athugasemdir og umsagnir á netfangið namskra@mrn.is. Frestur til að skila umsögnum eða athugasemdum er til 1. maí 2011.  Stefnt er að því að gefa út nýjan almennan hluta aðalnámskrár grunnskóla haustið 2011.  Vinna við greinahluta aðalnámskrár er að hefjast og stefnt er að útgáfu þeirra í áföngum árið 2012.