Fréttir

Til foreldra og forráðamanna nemenda í Naustaskóla Sælt veri fólkið Árshátíðarvika í Naustaskóla dagana 29. - 31. mars. Miðvikudaginn 29. mars bjóðum við foreldrum og aðstandendum að koma og sjá nemendur stíga á svið. En sýndar verða fjórar sýningar þann dag kl. 9:00, kl. 12:00, kl. 15:00 og kl. 18:00. Foreldrar fá sendar upplýsingar um í hvaða sýningarhópi þeirra börn eru og á hvað sýningum þau sýna. Eftir hverja sýningu verða seldar kaffiveitingar og rennur allur ágóði í ferðasjóð 10. bekkjar. Verð fyrir fullorðna er 1000 kr og fyrir börn 500 kr. - hægt verður að greiða með greiðslukorti. Á miðvikudeginum - sýningardegi mæta nemendur einungis til að sýna en nemendur í 1. – 3. bekk geta verið í Frístund frá 8:00 – 13:00 þann dag, skráning er óþörf. Eftir hádegi er Frístund einungis opin fyrir þau börn sem þar eru skráð. Á fimmtudeginum er síðan seinni árshátíðardagurinn okkar sem við köllum gleðidag – þá skemmta nemendur og starfsfólk sér saman á fjölbreyttum stöðvum sem dreifast um skólann og lýkur skóla kl. 13:10 þann dag. Á föstudaginn ljúkum við þessari viku með rólegheitum inn á svæðum þar sem kennarar skipuleggja eitthvað skemmtilegt með nemendum. Við minnum á að skóla líkur kl. 12 á föstudaginn en Frístund er opin fyrir þau börn sem þar eru skráð. Gleðilega páska! Stjórnendur Naustaskóla.

Öll börn eiga rétt á menntun. Grunnmenntun á að vera ókeypis og öll börn eiga að hafa aðgang að framhaldsmenntun. Hvetja á börn til þess að mennta sig. Aldrei má beita barn ofbeldi eða niðurlægja það, svo sem vegna brota á skólareglum.

Í gær, þriðjudag, var haldin undankeppni upplestrarkeppninnar Upphátt í 7. bekk. Allir nemendur lásu pistil og ljóð á sal skólans og stóðu sig öll með prýði. Dómnefnd valdi síðan tvo fulltrúa til að taka þátt í aðalkeppninni en það voru þau Eyja B. Guðlausdóttir og Sölvi Sverrisson. Keppnin fer fram í Hofi þann 7. mars. Dómnefndina skipuðu Erna Kristín Sigmundsdóttir, Halla Jóhannesdóttir, Halldóra Steinunn Gestsdóttir, og Valdís Rut Jósavinsdóttir.

Hér koma myndir frá vel heppnuðum útivistardegi. Farið var á skauta, svigskíði og gönguskíði og aðrir renndu sér á sleða. Það var fallegt veður en ansi kalt í fjallinu svo margir komu með rauðar kinnar heim.

Við óskum nemendum og foreldrum þeirra okkar bestu jóla - og nýárskveðjur. Skólastarf hefst að ný þriðjudaginn 3. janúar. Starfsfólk Naustaskóla.

Um síðastliðna helgi fór Legolið Naustaskóla til Reykjavíkur og tók þátt í First Lego League 2022 sem var haldin laugardaginn 19.nóvember 2022 í Háskólabíó. https://firstlego.is/keppnin/ Lego lið Naustaskóla var skipað þeim Ingólfi, Patreki, Viktori, Jóel, Rúnari og Lárusi. Þau sem komu liðinu til aðstoðar voru Ísold sem sá um hönnun á logoi á bolum liðsins og Jóhann Valur sem hannaði og bjó til spil sem liðið notaði. Þema ársins var SUPERPOWERED℠ áskorun. FIRST LEGO League liðin könnuðu hvaðan orka kemur og hvernig henni er dreift, hvernig hún er geymd og notuð – þá munu þau leggja til sína ofurkrafta og beita aðferðum rannsókna og nýsköpunar við að koma með hugmyndir að betri framtíð í orkumálum. Stóðu þau sig mjög vel og fer þessi keppni í reynslubanka þeirra.

Það er líf og fjör í Naustaskóla þessa dagana. Í dag mánudag 21.nóv byrjuðu þemadagar sem standa fram á miðvikudag. Þemadagarnir eru helgaðir Barnasáttmála Sameinuðu þjóðanna að þessu sinni. Nemendum skólans er skipt niður á þrjú svæði og eru margar stöðvar á hverju svæði. Vonandi verður þetta til að auðga kunnáttu nemenda og starfsfólks á Barnsáttmálanum. Við endum síðan með Barnaþingi næstkomandi fimmtudag þar sem málefni sem nemendur hafa sjálfir komið með tillögur að, eru rædd.