Fréttir

Útivistardagurinn í gær var alveg með besta móti og veðirð lék heldur betur við okkur enda var ekki hægt annað en lengja viðveru í fjallinu. Það sést á myndum sem hér má sjá frá deginum, allir með bros á vör.

Til foreldra og forráðamanna nemenda í Naustaskóla Árshátíðarvika í Naustaskóla dagana 19. - 22. mars. Fimmtudaginn 21. mars bjóðum við foreldrum og aðstandendum að koma og sjá nemendur stíga á svið. Sýndar verða fjórar sýningar þann dag kl. 9:00, kl. 12:00, kl. 15:00 og kl. 18:00. Foreldrar fá sendar upplýsingar um í hvaða sýningarhóp þeirra börn eru og á hvaða sýningum þau sýna. Eftir hverja sýningu verða seldar kaffiveitingar og rennur allur ágóði í ferðasjóð 10. bekkjar. Verð fyrir fullorðna er 1000 kr. og fyrir börn 500 kr. - hægt verður að greiða með greiðslukorti. Á fimmtudeginum – sýningardegi, mæta nemendur einungis til að sýna en nemendur í 1. - 3. bekk geta verið í Frístund frá 8:00 - 13:00 þann dag, skráning er óþörf. Eftir hádegi er Frístund einungis opin fyrir þau börn sem þar eru skráð. Á föstudaginn ljúkum við þessari viku með rólegheitum inni á svæðum þar sem kennarar skipuleggja eitthvað skemmtilegt með nemendum. Við minnum á að skóla líkur kl. 12 á þann dag/föstudaginn 22. mars, en Frístund er opin fyrir þau börn sem þar eru skráð. Kökur fyrir kaffihlaðborðið Sú hefð hefur skapast í Naustaskóla að hvert heimili kemur með einn rétt eða eina köku á hlaðborð en gestum árshátíðarinnar gefst kostur á að kaupa sér kaffi og með því í lok sýninganna. Ágóði kaffisölunnar rennur í ferðasjóð 10. bekkjar en þau sjá um kaffisöluna ásamt foreldrum sínum. Þetta fyrirkomulag hefur gengið vel hingað til og vonum við að svo verði áfram. Næstu árgangar munu síðan njóta góðs af kaffisölu á árshátíðum í framtíðinni. Búið er að setja upp skipulag yfir hvað ætlast er til að hver árgangur komi með og er það hér í viðhengi. Ef í skólanum eru fleiri en eitt barn frá sama heimili má velja hvorn réttinn það kemur með. Við tökum á móti veitingum í heimilisfræðistofunni á milli kl. 8:15 -11:00 á árshátíðardaginn/ fimmtudaginn 21. mars. Við biðjum ykkur að merkja ílát vel með nafni barns ykkar svo það skili sér aftur heim. Verð fyrir fullorðna á kaffihlaðborðið er 1000 kr. fyrir fullorðna og 500 kr. fyrir grunnskólanemendur. Í viðhengi er hægt að skoða skipulag sýninganna og tímasetningar og bakstursplan. Gleðilega páska! Stjórnendur Naustaskóla.

Upphátt, upplestrarkeppni grunnskólanna á Akureyri var haldin í Hofi í gær. Fulltrúi okkar, Konný Björk Þórðardóttir varð í 2. sæti keppninnar og óskum við henni innilega til hamingju með frammistöðuna.

Í dag var haldin undankeppni upplestrarkeppninnar Upphátt í 7. bekk. Nemendur lásu texta og ljóð á sal skólans og stóðu sig vel. Dómnefnd var skipuð af Hólmfríði Sigurðardóttur, Maríu Steingrímsdóttur og Þorgerði Sigurðardóttur. Valdir voru fulltrúarnir Eyþór Páll Ólafsson, Konný Björk Þórðardóttir og Máni Kristjánsson til keppa fyrir hönd skólans í aðalkeppninni sem fram fer í Hofi þann 7. mars nk.

Á morgun, fimmtudaginn 29. febrúar er nemendum í 9. og 10. bekk boðið að að koma á Starfamessu og kynna sér fjölbreytt störf og fyrirtæki á svæðinu. Starfamessan verður haldin í Háskólanum á Akureyri og stendur frá klukkan 09:00-12:00 og er árlegur viðburður skipulagður af náms- og starfsráðgjöfum í grunnskólum Akureyrarbæjar í samvinnu við Háskólann á Akureyri. Á Starfamessunni verða fjölmörg fyrirtæki og stofnanir saman á einum stað til þess að kynna sig og sína starfssemi fyrir nemendum sem eru hvattir til að nýta sér þetta tækifæri til þess að skoða hin ýmsu fyrirtæki og stofnanir og þeim framtíðarmöguleikum sem í boði eru.

10. bekkur Naustaskóla stendur fyrir POP-up viðburði í skólanum til fjáröflunar á morgun miðvikudag, 28. febrúar kl. 17:00-21:00. Þar verða í boði fjölbreyttir réttir frá ólíkum menningarheimum og alls kyns fræðsla. Sjá facebook viðburð:

Í morgun héldum við Litlujól í Naustaskóla. Morguninn byrjaði með fallegum helgileik í boði 4. bekkjar og því næst fóru allir inn í íþróttasalinn sem búið var að skreyta hátt og lágt. Þar var dansað í kringum jólatréð við undirleik Sigríðar Huldu og þrír skemmtilegir jólsveinar kíktu í heimsókn. Krakkarnir fóru síðan í sínar stofur og áttu notalega stund með starfsfólki og jólasveinarnir kíktu meira að segja þangað líka! Unglingadeildin hélt sín litlujól í gærkvöld með sínum kennurum og starfsfólki unglingadeildar. Eftir að börnin fóru heim í dag borðaði starfsfólk saman jóla hádegisverð og Svavar Knútur kom í heimsók með söng og skemmtilegheit. Hér eru nokkrar myndir. Starfsfólk Naustaskóla sendir nemendum, foreldrum og forráðamamönnum þeirra gleðilegra jóla. Frístund opnar þann 3. janúar á nýju ári og skóli hefst þann 4. janúar.