Fréttir

Í dag var uppskeruhátíð lestrarátaks sem stóð yfir í tvær vikur og viðurkenningar veittar. Brynhildur Þórarinsdóttir rithöfundur kom í heimsókn og veitti nemendum bikara og Telma Ósk Þórhallsdóttir, fulltrúi nemendaráðs tilkynnti verðlaunahafa. Á yngsta stigi bar 1. bekkur sigur úr býtum, 4.-5. bekkur á miðstigi og 8. bekkur á unglingastigi en þau fengu bikara fyrir flestar bækur lesnar. Í lokin sungu allir saman jólalag undir stjórn Stefáns kennara í 4. og 5. bekk.

Vekjum athygli á auglýsingu sem birtist í dagskránni um fyrirlestur fyrir foreldra um kynlíf og klám. Fyrirlesturinn verður í Síðuskóla í kvöld 6. des og hefst kl. 20:00. Sigga Dögg kynfræðingur heimsækir alla 8. bekkinga á Akureyri í þessari viku og verður í Naustaskóla á morgun, miðvikudag. Fyirlesturinn er opinn öllum foreldrum.

Í kvöld, föstudagskvöld stendur 10. bekkur fyrir árshátíðarballi í Naustaskóla. Ballið byrjar kl. 20:00 og stendur til kl. 23:30. Aðgangseyrir er 1500 krónur en nemendur í 7. bekk fá að vera á ballinu til kl. 10:30 og kostar 1000 kr. fyrir þau. Alexander Jarl mætir á svæðið og DJ Viktor Axel. Sjoppa verður á staðnum og posi.

Í dag var síðasti vinnudagur Lillu skólaliða sem hefur unnið við skólann frá upphafi hans. Lilla var kvödd með ýmsu móti og m.a. ákváðu nemendur og kennarar í 1. bekk að koma Lillu á óvart og kveðja hana með fallegum söng. Þetta var hjartnæm stund enda Lilla búin að vera nemendum stoð og stytta og munum við sakna hennar sárt. Við óskum Lillu gæfu og þökkum henni fyrir vel unnin störf!

Í morgun var samvera á sal skólans í tilefni af degi íslenskrar tungu. Amanda Eir og Aðalheiður Jóna spiluðu á fiðlur og Katrín og Aron Snær, nemendur í úrslitum upplestrarkeppni síðasta árs lásu ljóð. Nemendur úr sjöunda bekk sem nú undirbúa sig fyrir Stóru upplestarkeppnina í ár lásu einnig saman ljóð og nemendur úr 4. bekk sungu fyrir okkur en búa sig nú einnig undir litlu upplestarkeppnina í ár.