Fréttir

Miðvikudaginn 9. desember var hefðbundinni stundaskrá hent út í horn og nemendur unnu að hinum ýmsu viðfangsefnum á margvíslegum stöðvum.  Unnið var hálftíma á hverri stöð en nemendur máttu sjálfir velja sér stöðvar/viðfangsefni hverju sinni.  Foreldrafélagið bauð svo upp á kakó í nestistímanum, 10. bekkur seldi skúffukökur og allt saman gekk þetta eins og best var á kosið.  Hér má sjá nokkrar myndir frá deginum..

Að morgni dags þann 1. desember komu allir nemendur skólans saman á samverustund þar sem m.a. voru tilkynnt úrslit í lestrarátakinu okkar.  Átakið hófst á degi íslenskrar tungu þann 16. nóvember og í tvær vikur kepptust allir nemendur skólans við að lesa sem mest og skrá niður þær mínútur sem nýttar voru til lestrar.  Síðan voru reiknuð meðaltöl fyrir hvern námshóp og að lokum var niðurstaðan sú að það voru nemendur í 2.-3. bekk sem höfðu lesið lengst að meðaltali.  Fulltrúar þess hóps voru því kallaðir upp á svið þar sem þau veittu móttöku bikar í viðurkenningarskyni fyrir árangurinn og á meðfylgjandi mynd má sjá fulltrúa hópsins með bikarinn góða.  Til hamingju og nú er um að gera að halda áfram að lesa af krafti og bæta færnina til framtíðar! 

Það er töluvert um heimsóknir hjá okkur þessa dagana, í síðustu viku kom Ævar vísindamaður og las úr nýrri bók sinni fyrir 4.-7. bekk.  Fyrir nokkru kom Arnar Már Arngrímsson og las fyrir unglingastigið úr bókinni Sölvasaga unglings og þann 4. des eigum við von á Villa vísindamanni til okkar.  Þar að auki hefur svo Menningarfélag Akureyrar boðið 2.-5. bekk að sjá sýninguna um Grýlu í Samkomuhúsinu og 1. bekk er boðið á tónleika í Hofi.  Semsagt nóg um að vera..   Myndin til hliðar er frá heimsókn Ævars vísindamanns..

Í dag kom slökkviliðið í heimsókn í 3. bekk.Fyrst fengu börnin fræðslu um eldvarnir en þessi vika 23.-27. nóvember er tileinkuð eldvörnum og jafnan kölluð Eldvarnarvikan. Eftir fræðsluna fengu þau tækifæri að fara út og skoða slökkviliðsbifreið.Hér eru nokkrar myndir. 

Hinn árlegi nemendadagur í Naustaskóla var haldinn hátíðlegur 13. nóvember sl. Á nemendadeginum er það nemendaráð skólans sem skipuleggur skólastarfið en hins vegar hafa myndast ýmsar hefðir eins og t.d. að hafa spurningakeppni og hæfileikakeppni starfsmanna, fótboltaleikur milli nemenda og starfsmanna o.fl. Nemendadagurinn fór prýðilega fram og allir skemmtu sér hið besta. Hér má smá nokkrar myndir frá deginum..

Þann 14. nóvember fór fram hin árlega "First Lego League" keppni í Háskólabíói.  Fjórða árið í röð átti Naustaskóli lið í keppninni og að vanda var okkar fólk skólanum til mikils sóma.  Gerðu þau góða ferð suður og lönduðu verðlaunum fyrir besta rannsóknarverkefnið en að auki fengu þau tilnefningu fyrir bestu hönnun á vélmenni.  Þetta er gríðarlega vel að verki staðið enda fer keppnin harðnandi og í þetta skiptið voru 22 lið í keppninni.  Á meðfylgjandi mynd má sjá liðið ásamt Magnúsi liðsstjóra sem hefur haft veg og vanda af þjálfuninni.  Til hamingju!

Framhaldsskólarnir tveir á Akureyri bjóða nemendum í 10. bekk í heimsókn til að kynna skólann og þær námsleiðir sem þar eru í boði. Í dag fóru 10 bekkingar í skólaheimsókn í Verkmenntaskólann á Akureyri. Rölt var á milli staða og fengu nemendur kynningu á bæði bóklegu- sem og verklegu námi sem þar fer fram. Menntaskólinn á Akureyri bíður síðan nemendum í heimsókn næstkomandi föstudag.   Hér má sjá nokkrar myndir frá heimsókninni í VMA

Um helmingur nemenda skólans hefur nú þegar keypt sér skólapeysu, þeir sem ekki hafa þegar nælt sér í eintak geta komið í skólann miðvikudaginn 4 nóvember milli 15-17. Athugið að greiða þarf við pöntun. Þeir sem búnir voru að panta fá sínar peysur afhentar í byrjun næstu viku.