Fréttir

Sl. fimmtudag héldu nemendur unglingastigs sýningu á verkefnum sem þau hafa verið að vinna að undanförnu en verkefnin snúast um forvarnir og fordóma af ýmsu tagi.  Nemendur hafa verið að kynna sér þau viðfangsefni og skiluðu svo af sér úrvinnslu námsins á margvíslegu formi, með veggspjöldum, myndböndum, spilum, bæklingum, jafnvel bakstri o.fl. Hér má sjá nokkrar myndir frá sýningunni..

Barnabókasetur stendur nú fyrir myndbandasamkeppni fyrir nemendur í 5.-10. bekk í grunnskólum við Eyjafjörð. Markmiðið er að hvetja börn og unglinga til að lesa og tjá sig um bækurnar sem þau lesa. Nemendur geta unnið einir eða í hópi og hafa frjálsar hendur um efnistök, aðalatriðið er að þeir lesi og noti hugmyndaflugið og tæknina. Fjalla skal um eina barna- eða unglingabók að eigin vali í hverju myndbandi. Bókin þarf að hafa komið út á íslensku á árunum 2012-2014. Myndböndin skulu vera 2-3 mínútur að lengd. Vista skal myndböndin á youtube.com og senda slóðina og upplýsingar um höfunda til barnabokasetur@unak.is. Skilafrestur rennur út 2. apríl. Sjá nánar á amtsbok.is/siljan.

Við fengum stórskemmtilega heimsókn í vikunni frá þeim Láru Sóleyju Jóhannsdóttur fiðluleikara og Eyþóri Inga Jónssyni organista en þau héldu fyrir okkur tónleika sem þau kalla "Fiðla og fótstigið".  Þar er vísað til þess að þau spiluðu á fiðlu annars vegar en fótstigið orgel (harmóníum) hins vegar.  Flutt var tónlist eftir ýmsa meistara tónlistarsögunnar auk íslenskra þjóðlaga og fengu þá nemendur líka að taka undir með söng. 

Um daginn komu nokkrir góðir gestir í heimsókn í 10. bekk en þar var um að ræða fulltrúa frá Fjármálavit sem er verkefni á vegum Samtaka fjármálafyrirtækja, en verkefnið miðar að því að auka fjármálalæsi hjá ungu fólki.  Verið er að kynna nýtt fræðsluefni og naut Naustaskóli þess heiðurs að vera einn af allra fyrstu skólunum sem fengu þessa kynningu.  Á vefslóðunum hér fyrir neðan má sjá annars vegar umfjöllun á N4 um málið og hins vegar facebook-síðu verkefnisins þar sem er að finna umfjöllun og myndir frá heimsókninni til okkar. http://www.n4.is/is/thaettir/file/fjarmalalaesi-unglingahttps://www.facebook.com/fjarmalavit

Hin árlega upplestrarkeppni 7. bekkjar var haldin á sal skólans þann 25. febrúar.  Þar kepptu nemendur í upplestri og framsögn fyrir framan dómnefnd sem hafði það vandasama hlutverk að velja tvo fulltrúa skólans, og einn til vara, til að keppa á lokahátíð Stóru upplestrarkeppninnar á Akureyri, sem haldin verður þann 11. mars nk. í sal Menntaskólans.  Nemendur stóðu sig að venju afskaplega vel en að lokum urðu það þau Íris Orradóttir og Arnór Ísak Haddsson sem urðu fyrir valinu sem fulltrúar okkar, en Sigurður Bogi Ólafsson er varamaður.  Við erum stolt af þessum glæsilegu fulltrúum okkar, óskum þeim til hamingju með árangurinn og góðs gengis í keppninni framundan.