Fréttir

Fréttabréf nóvembermánaðar er komið út og má nálgast það hér...

Fimmtudaginn 29. október munum við halda upp á hrekkjavökuna með dansleikjum fyrir nemendur skólans. Það er 7. bekkur sem heldur böllin og ágóði rennur í ferðasjóð vegna skólabúðaferðar þeirra í vor.Kl. 17:00-18:30 verður ball fyrir nemendur í 1.-3. bekk og kl. 19:00-20:30 verður ball fyrir nemendur í 4.-6. bekk.  Aðgangseyrir er 500 kr., djús og popp innifalið fyrir 1.-3. bekk en sjoppan opin fyrir 4.-6. bekk.  Draugahús, spámaður, limbó o.fl.

Fimmtudagurinn 22. október er viðtalsdagur, þá er ekki kennsla en nemendur og foreldrar mæta í stutt viðtal við umsjónarkennara.  Foreldrar bóka viðtöl á fjölskylduvef mentor.is, hér má finna leiðbeiningar varðandi það.Föstudaginn 23. október og mánudaginn 26. október er svo vetrarfrí hjá okkur. Frístund er opin alla þessa daga. 

Síðastliðinn föstudag og fram á liðna helgi varð töluverð umfjöllun í ýmsum netmiðlum sem snerti nemendur við Naustaskóla.  Má segja að þar hafi m.a. verið dregin upp sú mynd af skólanum að þar fengi einelti og ofbeldi að viðgangast óáreitt og að starfsfólk skólans bregðist lítt við ef slíkir atburðir koma upp.  Fátt er fjær sanni enda má þar t.d. benda á að könnun Skólapúlsins sl. vor sýndi að mat foreldra á líðan nemenda í skólanum er fyrir ofan landsmeðaltal og einnig má nefna að í þeim tilfellum sem grunur vaknar um einelti er meiri ánægja með viðbrögð skólans en almennt gerist. Þessar niðurstöður og fleiri sem varða skólastarfið geta áhugasamir nálgast á heimasíðu skólans. Umfjöllunin orkaði verulega tvímælis enda höfðu netmiðlarnir ekki fyrir því að leita eftir sjónarmiði eða skýringum skólans. Mál af því tagi sem um ræðir eru alltaf viðkvæm og flókin og því eðlilegt að á þeim séu að minnsta kosti tvær hliðar sem lýsa þarf ef fjalla á um málin á tæmandi hátt, hins vegar er það afar erfitt fyrir skóla vegna persónuverndarsjónarmiða.Skóli og foreldri drengsins sem um ræddi funduðu þegar sl. mánudag og fóru yfir málin og munu vinna saman að því að tryggja velferð hans, enda það sem mestu máli skiptir.   Ágúst Jakobsson skólastjóri

Á aðalfundi Foreldrafélagsins þann 17. september störfuðu vinnuhópar sem settu niður skipulag fyrir bekkjarkvöld skólaársins.  Þannig er búið að skipuleggja í grófum dráttum hvað á að gera og dagsetja flesta viðburði svo að nú er bara að framkvæma!  Hér má sjá yfirlitið og hverjir ætla að sjá um að minna foreldra á þegar dregur að viðburðunum..

Fréttabréf októbermánaðar er nú komið út og má nálgast það hér..

Nú er starfsáætlun skólans komin á netið en þar er um að ræða upplýsingarit og handbók um skólastarfið sem hefur að geyma allar helstu upplýsingar um skólaárið, stefnu skólans og áherslur í vetur.  Jafnframt erum við svo að birta starfsáætlanir kennsluteyma sem hafa að geyma nánari útfærslur á stefnu og starfsháttum fyrir hvert aldursstig.  Sjá hér..