Fréttir

Á miðvikudaginn kom norskur vísindasirkus í heimsókn. Þeir félagar Magne og Ivar sýndu nemendum margar flottar og skemmtilegar tilraunir sem voru töfrum líkastar. Börnin voru mjög spennt og supu stundum hveljur, svo spennandi var þetta allt saman. Eftir sýninguna fengu nemendur í 4.-7. bekk að prófa að gera nokkrar tilraunir eins og að búa til bíla úr pappa, plaströrum og plasthringjum, eldflaugar og fleira skemmtilegt. Hér er hægt að sjá myndir frá þessum skemmtilega viðburði.

Meðan að nemendur í 4. og 7. bekk þreyttu samræmd prófum á dögunum fengu félagar þeirra í 5. og 6. bekk alveg sérstaka dagskrá sem innifól m.a. ferð í Krossanesborgir í fylgd íþróttakennara.  Hér má sjá nokkrar myndir...  

Töframaðurinn Einar Mikael kom í heimsókn í skólann í gær og sýndi krökkunum hin ýmsu töfrabrögð. Hér eru nokkrar myndir frá sýningunni.

Nú hefur nemendaráð ákveðið að "litur skólans" til framtíðar verði ljósblár.  10. bekkur hefur nú í hyggju að fara að selja boli og þá þurfti að ákveða lit þannig að sem flestir geti keypt sér bol í lit skólans t.d. til að mæta í þegar íþróttakeppnir eiga sér stað o.s.frv.  Litir hafa nokkuð verið á reiki milli skóla og milli keppna, við höfum hingað til notað bæði appelsínugulan og fjólubláan en aðrir skólar nota einnig þá liti og var því ákveðið að finna nýjan lit.  Eftir nokkrar umræður komst nemendaráð að þeirri niðurstöðu að ljósblár yrði litur Naustaskóla, enda er sá litur ekki í notkun annars staðar, bæði kyn virðast fella sig vel við hann og hann fer vel með merki skólans.

Einn góðviðrisdaginn í haust brugðu nemendur í 2.-3. bekk sér í Naustaborgir og notuðu blíðviðrið til að spóka sig og læra utandyra.  Í þetta skiptið smelltu þau líka af nokkrum stórskemmtilegum myndum sem má sjá með því að smella hér..  

Ágætu foreldrar. Laugardaginn 20 september verður safnast saman við Naustaskóla kl. 12 og hjólað kl.12.30 að nýjum göngu- og hjólastíg við Drottningarbraut. Tilvalið tækifæri fyrir fjölskylduna að hjóla saman og enda svo í grillveislu á Ráðhústorgi. Hjólalest fer frá Naustaskóla og það væri gaman að sjá sem flesta úr okkar hverfi. Hjólreiðafélag Akureyrar leiðir hjólalestir frá grunnskólum bæjarins að nýjum göngu- og hjólreiðastíg við Drottningarbraut. kl. 13:00 Nýr göngu- og hjólreiðastígur formlega vígður við gatnamót Miðhúsabrautar og Drottningarbrautar. Þaðan hjólað saman að Ráðhústorgi. kl. 13:30 Dagskrá á Ráðhústorgi. Grillaðar pylsur og drykkir í boði Kynning á vistvænum ökutækjum og rafhjólum Börnin fá að skreyta göturnar Myndataka fyrir þá sem vilja, í bílstjórasæti strætó Slökkviliðið mætir á svæðið Svo er bara að klæða sig eftir veðri og að sjálfsögðu gildir; ENGINN HJÁLMUR – EKKERT HJÓL Góða skemmtun