Fréttir

Fyrsta nemendaráð Naustaskóla hefur nú verið kjörið eftir æsispennandi kosningabaráttu.  Fulltrúar í nemendaráði eru þau Hrannar Þór (formaður) og Birna María úr 7. bekk, Erna úr 6. bekk, Hermann úr 5. bekk og Freyr úr 4. bekk.  Til vara voru kjörin Kristófer 7. bekk, Daníel 6. bekk, Sandra og Ugla 5. bekk og Katrín 4. bekk.  Hér til hliðar má sjá mynd af nýkjörnu nemendaráðinu. 

Þá er fréttabréf nóvembermánaðar komið út.  Smellið hér til að opna bréfið....

Þriðjudaginn 10. nóvember kl. 17:30-18:30 verður boðið upp á kynningu fyrir foreldra nemenda í 1.-3. bekk á kennsluaðferðinni Byrjendalæsi.  Byrjendalæsi er kennsluaðferð sem við erum að nota mikið í þessum bekkjum og setur mjög mark sitt á starfið þar.  Meginmarkmið Byrjendalæsis er að börn nái góðum árangri í læsi sem fyrst á skólagöngunni en um leið hentar aðferðin einkar vel til samþættingar og tengsla við hinar ýmsu námsgreinar.

Á fundi þann 29. október sl. var Foreldrafélag Naustaskóla stofnað.  Markmið félagsins er að: vera samstarfsvettvangur foreldra sem eiga börn í skólanum. efla og tryggja gott samstarf foreldra og starfsfólks skólans. styðja heimili og skóla við að skapa nemendum góð uppeldis- og menntunarskilyrði. koma á framfæri sjónarmiðum foreldra varðandi skóla- og uppeldismál. standa vörð um réttindi barna til mennta og aukins þroska.  

Þriðjudaginn 3. nóvember kl. 17-19 verður hrekkjavökuball í skólanum fyrir 1.-6. bekk.  Það er 7. bekkur sem heldur ballið og er það liður í fjáröflun þeirra fyrir ferð í Skólabúðir í vor. Aðgangseyrir er 500 kr. og er drykkur innifalinn í þeirri fjárhæð. Veitt verða verðlaun fyrir besta búninginn, á staðnum verður draugahús, sjoppa, farið í leiki o.fl. Hér má hins vegar fræðast um hrekkjavökuna....

Fimmtudaginn 29. október verður haldinn stofnfundur Foreldrafélags Naustaskóla kl. 20:00-21:30.  Dagskrá fundarins er sem hér segir: 1. Kynning á tilgangi og markmiðum foreldrafélaga 2. Drög að lögum Foreldrafélags Naustaskóla 3. Kjör stjórnar 4. Tillaga um félagsgjald 5. Umræður / hugmyndir um foreldrastarf við skólann 6. Kynning á agastefnu skólans 7. Umræður og önnur mál Drög að lögum fyrir félagið má nálgast hér en þau bíða svo yfirferðar og mótunar fundarins og nýrrar stjórnar.

Í yngri bekkjum skólans er unnið með kennsluaðferðina "Byrjendalæsi" en meginmarkmið þeirrar aðferðar er að börn nái góðum árangri í læsi sem allra fyrst á skólagöngu sinni.   Kennsluaðferðin hefur verið mótuð og þróuð við Skólaþróunarsvið Háskólans á Akureyri undir forystu Rósu Eggertsdóttur. Gengið er út frá því börn þurfi lesefni sem kveikir áhuga þeirra, ýtir undir ímyndunaraflið, hvetur þau til gagnrýninnar hugsunar og gefur þeim færi á að mynda merkingarbærar tengingar við eigið líf. Því er margs konar gæðatexti lagður til grundvallar lestrarkennslunni og hann nýttur sem efniviður í vinnu með stafi og hljóð, sem og vinnu með orðaforða, skilning og ritun af ýmsu tagi. Á vefsíðu Skólaþróunarsviðs er m.a. að finna Byrjendalæsisblaðið en þar má nálgast ýmsar upplýsingar um aðferðina sem gaman er að kynna sér.  Smellið hér til að skoða Byrjendalæsisblaðið...