Fréttir

Kynningarfundur fyrir 1. bekk (árgang 2003), verður haldinn þriðjudaginn 19. maí kl. 17:00 á leikskólanum Naustatjörn.  Þar mun skólastjóri kynna skólann og þann hluta starfsins sem snýr að 1. bekk sérstaklega og tveir af tilvonandi  kennurum 1. bekkjar munu ræða málin við nemendur og kynnast þeim örlítið...

Störf skólaritara og umsjónarmanns við Naustaskóla eru nú laus til umsóknar og er umsóknarfrestur til 22. maí nk.  Hægt er að sækja um störfin á umsóknavef Akureyrarbæjar.

Ákveðið hefur verið að eldhús Naustatjarnar muni sjá um matreiðslu fyrir Naustaskóla þangað til við fáum okkar eigið eldhús.  Maturinn verður því eldaður í leikskólanum en síðan fluttur yfir og skammtaður í skólanum.  Þar sem ekki er um að ræða matsal í þessum áfanga byggingarinnar gerum við ráð fyrir að nemendur matist á sínum heimasvæðum.  Gera þarf nokkrar breytingar á eldhúsi Naustatjarnar, bæta við búnaði o.fl. og er unnið að undirbúningi þeirra mála.

Ingibjörg S. Ingimundardóttir hefur verið ráðin skólahjúkrunarfræðingur við Naustaskóla.  Ingibjörg er starfandi skólahjúkrunarfræðingur við Oddeyrarskóla en mun einnig þjóna Naustaskóla í hlutastarfi. Heilsugæslustöðin á Akureyri annast skólahjúkrun og ræður skólahjúkrunarfræðinga að grunnskólum bæjarins.

Á skólanefndarfundi á dögunum var samþykkt að bæta við einni deild á Naustatjörn en undanfarin misseri  hefur leikskólinn ekki annað eftirspurn eftir plássum hér í hverfinu. Fimmta deildin verður staðsett í húsnæði Naustaskóla, í norð-austur horni skólans við inngang, og fær þar til afnota 58 fm. stofu auk 9 og 18 fm. herbergja.  Þá höfum við á prjónunum margvíslegt samstarf milli skólanna á ýmsum sviðum, höfum við sett á blað drög að samstarfsáætlun milli skólanna þar sem þessum áformum er líst í grófum dráttum, plaggið má sjá hér....

Eins og gefur að skilja eru margir forvitnir um þá kennara sem búið er að ráða að skólanum.  Hér á eftir má finna örstutta kynningu á hverjum og einum hinna 11 kennara ásamt myndum af þeim.

Eins og kunnugt er barst mikill fjöldi umsókna um kennarastöður við skólann og hafa nú 11 umsækjendur verið valdir úr hópnum. Þessi hópur hefur að geyma afar fjölbreytta þekkingu, reynslu og hæfileika og er hugmyndin að við getum í sameiningu annast kennslu í þeim námsgreinum sem krafist er og vonandi rúmlega það :)        Hér má sjá nöfn kennarahópsins auk þess hvernig hugmyndin er að umsjón nemendahópsins skiptist á kennara;

Bryndís Björnsdóttir hefur verið valin úr hópi umsækjenda um stöðu deildarstjóra við Naustaskóla. Bryndís útskrifaðist sem þroskaþjálfi 1987, með B.A. próf í sérkennslufræðum frá KHÍ 1994 og með M.Ed. gráðu í menntunarfræðum frá HÍ snemma árs 2009. Hún starfaði sem þroskaþjálfi og kennari við Grunnskólann í Ólafsfirði 1987-1995, sem þroskaþjálfi og sérkennari við Síðuskóla 1995-1998, vann sem einhverfuráðgjafi og við undirbúning stofnunar sérdeildar í Síðuskóla fyrir einhverf börn 1998-1999, hún stýrði þeirri deild 1999-2006 og hefur verið fagstjóri í sérkennslu í Síðuskóla frá 2007. Í lokaritgerð hennar til M.Ed. gráðu fjallaði hún um áhrifaþætti á vinnubrögð kennara með fjölbreyttum nemendahópum.